Көз

Көз икәнен белмиләр

Салкын таңны яфрак каплый,
Җирдә ята сары шәл.
Һавага сагышын чәчкән
Алтын көзнең зары жәл.

Шәлне күтәргәли җилләр,
Шукъ яңгырлар ашыга,
Кояш киткәнен көтә дә
Килеп чыга каршыга.

Маңгай терәп тәрәзәгә
Шаян көзне күзәтәм.
Аңымда буталып беткән
Хисләремне төзәтәм.

Казлар оча, китмәс кебек,
Тик борылмый кирегә.
Адашмыйча, юллар табып
Кайтыр микән бирегә?

Чынлап шаяра яңгырлар,
Вальс көенә бииләр.
…Тышта түгел, күңелемдә
Көз икәнен белмиләр.

Венер Фәттах

*****

Менә тагын көзгә килеп кердек,
Күңелләргә сагыш үрелә.
Җәен янган учаклар да сүнә,
Әкрен генә сүнеп сүрелә.

Нигә көзен күңел моңлана да,
Җаннарыма нигә шом сала.
Нигә җәен дәртләнгән йөрәгем,
Көзен килеп һушымны ала.

Фирдат Валеев

*****

Читать далее

Хәтирәләр

Кадерле хәтирәләр

Балачагым искә төшә…
Утын яккан ак мичләр.
Тәрәз капкачын каерган,
Көзге, шук, шаян җилләр.
Радиодан яңгыраган
Салмак кына җыр-көйләр.
Әнием аруын онытып
Сөйләгән әкиятләр.
Иртән, без торганчы, әни
Пешергән пәрәмәчләр.
Зәңгәр мәтрүшкә, бөтнекле,
Хуш исле, тәмле чәйләр.
Эх, балачак, үткән киткән…
Кадерле хатирәләр.
Күпме генә сагынсак та,
Кайтмас инде ул көннәр.

Лилия Сәлахетдинова
Читать далее

Исемнэр турында шигырьлэр

Гүзәлия

Гүзәл сүзен ачыклар сүз,
Җир йөзендә бар микән.
Гүзәлгә тиң саф таң суымы,
Әллә ап-ак кар микән.

Гүзәл кеше гүзәллекне
Кайлардан ала икән.
Сихри исеме бар кешегә,
Сер булып кала микән.

Шуңа аңа кушылгандыр,
Гүзәл исем – Гүзәлия.
Таң суы да тиң түгел, син
Серле Гүзәллеккә ия!

Ильдар Бикмуллин

*****

Ландыш исемле гүзәл затларга

Ак кыңгырау чәчәкләрең –
Саф хисле бүләк язда.
Елмаюың синең Ландыш,
Җаныма чиксез файда.

Энҗе бөртекләрем Ландыш!
Елмайчы китсен сагыш!
Кил яныма итмә ялгыз –
Оныта күрмә ялгыш!

Бул тормышта бердәнберем
Минем затлы бөртегем!
Син бит, Ландыш гүзәллеге
Гомеремдә һәр көннең!

Роберт Шаймарданов
Читать далее

Хайваннар, кошлар турында

Песнәк

Алтын көзләр узып китте,
Ап-ак кыш килеп җитте.
Ап-ак кар яуды җиргә,
Җир акка чумды инде.

Әнә агачта бер песнәк,
Җим эзләп йөри икән.
Ары карый, бире карый
Бер дә табалмый микән?!

Мин озак карап тормыйчан
Тотындым үз эшемә.
Җимлек ясадым кошчыкка,
Элдем куак түшенә.

Песнәгем бик тә шатланды,
Минем эшемне күреп.
Рәхмәт әйтеп, баш селекте
Яныма очып килеп.

Лилия Сәлахетдинова

*****

Кыр кәҗәсе

Әкиятле урманда
Кышның салкын көнендә
Ак карны ера-ера
Әллә кәҗәме чаба?

Бик курка инде үзе
Елтырый аның күзе.
Әллә инде адашкан
Әллә юлын ялгышкан.

Агачлар арасында,
Ботаклар карасында
Кача-кача йөгерә
Көтүгә өлгерергә.

Көтүе белән бергә
Тели кәҗә булырга.
Табып бәләкәй бәти
Булырга аңа әни.

Җылы язның көнендә
Йөрергә ул чирәмдә
Назлап кына яратып
Бәләкәчен ияртеп.

Өйрәтеп ул яшәргә,
Бүреләрдән качарга.
Әкиятле урманда,
Чәчәк тулы аланда

Лилия Гиматдинова ( Хисамова)

*****
Читать далее

Табигать

Каеннар

Юл читендә айкала да чайкала
Ак каеннар, яшь каеннар,
Каеннар…
Тирә-якта шаулый бодай диңгезе, ‘
Сорый кебек: «Әйтче, егет, син безгә —
Күңелеңдә нинди уй бар, кайгы бар?»

Уем тик шул: ятыйм каен төбендә,
Арып-талып бодай ургач хәл алып,
Сайрар кошлар яңгыратсыннар тирәмне,
Серләшсен дә шыбырдашсын һәр яфрак —
Серле булу каеннарга хәләл ул.

Яки ятыйм каеннарның төбендә,
Есенинның томын тотып, уйланып.
Ай тулышкан һәм болытсыз кичләрдә,
Таң чыкларын көтеп алалмый һич тә,
Тирбәлешсен ак каеннар — уянып.

Озакбай Пирҗанов
Марс Шабаев тәрҗемәсе

*****

Читать далее