Яңа ел белән!


Хуш киләсең Яңа ел!

Толпар атым, салып канатыңа,
Ак бәхетләр, шатлык алып кил!
Тоякларың арымасын юлда,
Атлап түгел, очып безгә кил!

Йолдызлардан илһам нурлары ал,
Ай нурыннан ал син мәхәббәт!
Түкми-чәчми сип син күңелемә.
Шул хисләрдән миңа бик рәхәт!

Хуш киләсен безгә, өр-Яңа ел!
Килер юлың булсын ак кына!
Яңа өмет, яңа хыял белән,
Без чыгарбыз синең каршыңа!

Гульфия Гизатова

*****

Яңа ел төне

Шампан очкыннары, салют белән
Шаулап үтә Яңа ел төне.
Яңа елда яңа өмет булып
Куна йөзгә карлар бөртеге.

Кушымта:
Без җырлыйбыз, без биибез бүген,
Безгә бүген Яңа ел килә!
Шау-гөргә күмә, Яңа ел килә,
Һәркемгә дә елмаеп көлә.

Үткән белән, киткән хисләр белән,
Саубыллаша Яңа ел төне.
Дуслар, туганнар белән бергәләп,
Бу төн үтә шаян-көлкеле.

Чыршы үзе дә бик шат шикелле,
Йолдызлар җемелдәп бииләр.
Бу төнне һәркем ачып ишеген:
-Әйдә, бәхетле ел, кил, — диләр.

Венер Фәттах

******

Яңа Ел килә

Бәлләүр бокал чыңнарына,
Күмелә бүген Җир — шары.
Һич көттерми,бик тиз генә,
Килде Яңа Ел тагы!

Аттай эшләп арганнан соң,
Кәҗә булып мекердәп,
Үтәр тагын бер елыбыз,
Сиздермичә кештердәп.

Еллар шулай үтә торсын,
Яңалары кабат килсен.
Елның һәрбер үткән көне,
Тик бәхет — шатлык китерсен.

Күңел ап-ак йомшак булсын,
Теләкләр гел актан булсын!
Табыныбыз мулдан булып,
Шау — гөр килеп гөрләп торсын!

Гульсум Набиуллина

*****

Яңа елга теләкләр

Зәңгәр кәҗә елы килә диләр,
Нигә зәңгәр икән, ак түгел?
Ап-ак карлар, ак бәхетләр тулы
Сафлык көтә кыштан бу күңел.

Күкнең бары зәңгәрлеген тели,
Тынлык тели илем күгендә.
Балаларның шат тавышы сыман,
Җырлы гомер тансык бүгенгә.

Кәҗә елы килә. Әйдә, килсен!
Муллык булсын илдә, түрләрдә,
Юллар ярып барсын адашканга –
Алып менсен бары үрләргә.

Шуклык белән килсен Кәҗә елы,
Бер өйне дә урап узмасын.
Арындырсын кайгы, афәтләрдән,
Беркем үзен ялгыз тоймасын.

Карлар булып бары бәхет яусын,
Сау булсыннар дуслар, туганнар.
Дус яшәсен илләр, чәчәк атсын,
Шул муллыкта тулы бәхет бар.

Гөлфия Исхакова

*****

Читать далее →


Әнигә

Озын гомер телим, әни сиңа,
Сәламәтлек булсын hәрвакыт!
Бәхетләргә чумып, шатлыкларда йөзеп,
Алсу йөзен торсын гел балкып!

Гульфия Гизатова

*****

Ана шатлыгы

Куенымда бәләкәчем —
Җан кисәккәем нәни.
Шатлыгымның һич чиге юк,
Мин бит бүгеннән — Әни!

Роберт Шаймарданов

*****

Безнең бәйрәм җитә,
Кыз кардәшләр.
Бәйрәм белән, һәммәбезне дә!
Әни кеше йортның учагы ул,
Әни кеше ирнең — терәге !
Әни бит ул, сине юатучы,
Шатлыкларны безнең булүче.
Кайгы-хәсрәт булса,
Бары әни кеше,
Күзләреңнән аны белүче!
Әни бит ул, изге җанлы кеше,
Бала өчен бирә барысын да.
Кадерләрен белик янда чакта,
Котлап торыйк, һәр туар таңда!

Халисә Гәрәева

*****

Озак яшә әнием

Түзем булырга өйрәттең,
Һәрчак безне әнием.
Йокысыз төннәрең өчен
Бурычлы без әнкәем!

Кушымта:
Изге җанлы синең кебек
Әни юк беркем җирдә.
Нурлы йөзен, җылы сүзең
Көч бирә һәрчак безгә!

Сагындыра балачакның —
Назлы бишек җырларың.
Кабат кайтып яннарыңа
Мәңге тыңлап туймамын!

Кушымта шул ук
Инде тормышлы булсак та
Сиңа без сабый һаман.
Озын гомер яшә әнием —
Бәхеттә узсын заман!

Кушымта шул ук

Роберт Шаймарданов

*****

Бәйрәм җитә… әнкәемне,
Котлыйсым килә, бик тә…
Тик булмый шул, булмый инде,
Ул бит күптәннән күктә…
Бәйрәм җитә, бәгырьне өтә,
Әнкәемнең юклыгы…
Күзләреннән убәр идем
Чәчәк, бүләк итәр идем,
Иркәләп бер кочар идем,
Яннарына очар идем,
Барып кайтыр жир булса ….
Инде үзем әби күптән,
Әнкәемне сагынам, бик тә,
Исән чакта әнкәйләрне,
Көттермәгезче, сез дә !
Иркәләгез, кадерләгез,
Яратуыгыз яшермәгез
Әйтәсе матур сүзләрне,
Иртәгәгә күчермәгез.

Халисә Гәрәева

*****

Әниләр бәйрәме

Салкын көздә табигатькә
Яз китерә бу бәйрәм.
Саран кояш нурларында
Наз китерә бу бәйрәм.
Йөзләргә елмаю сибә,
Нур өләшә күңелгә,
Өйләргә сыймый, дөньяга
Җыр – моң булып түгелә.
Әниләр бәйрәме бүген –
Бәйрәмнәрнең олысы.
Һәр туган яңа таң өчен
Без әнигә бурычлы.
Тәбрик итик әниләрне,
Юллыйк ихлас теләкне.
Гомер язын бүләк иткән
Ана — тормыш терәге.

Римма Гайнанова

*****

Әнигә

Бер-бер артлы еллар узып тора,
Без үсәбез, синең яшең арта.
Әни, әнкәй! Инде ничә кышлар —
Ялгыз башың тормыш йөген тарта.

Юбилеең ишек какты килеп,
Каршы алыйк, әйдә, түргә узсын!
Бәхет булып килсен киләчәкләр,
Алларыңа гомер юлы сузсын.

Сәламәтлек тели сиңа күңел,
Уңыш тели эшләр эшләреңдә.
Хөрмәтебез тоеп яшә әнкәй,
Матур булсын күрер төшләрең дә.

Шатлыкларга туенып яшә әнкәй,
Яңа таңың тусын кояш тулып.
Яшә тагын сөенеп һәм сөелеп,
Без яраткан әни, әби булып.

Гульфия Исхакова

Бәбәй туена

Авылда бәбәй туе

Өстәл тулды бәлешләрдән
Юк нинди генәләре
Ит, балан, йөземнекедә
Кабакныкы хәтта килгән
Шундый уңган кемнәре?

Туй авылда, бәбәй туе
Бәбәйнең әтисе шат
Улыма иске йолача
Исемне куштырабыз ди
Масаеп куйды бер шарт

Малае да чын баһадир
Хас әтисе инде ул
Мулла исемен әйткәндә
Йомшак мендәр өсләрендә
Бер көйсезләнмәде ул!

Агылды матур теләкләр
Нурланды өйнең эче
Яшь әнинең күзләрендә
Ихтирамлап хәрберсенә
Балкыды сөенече

Нәнәйләре икесе дә
Беренче онык өчен
Бәхет теләп сөю салып
Изге теләкләр әйттеләр
Улы һәм кызы өчен

Сый таралды кунакларга
Бәлешләрне бүлделәр
Күңелле үтте мәҗлесе
Рәхмәт укып мулласын да
Хәерләргә күмделәр

Тәпи үстереп киттеләр
Дуслар, туган-тумача
Рәхмәт әйтеп, бәхет теләп
Күңелле иске йолача
Вәт мәләдис ичмаса!

Алия Султан

******

Җиңү көне белән!

Җиңү көне ул безнең

Кырык бернең 22 июнь
Илебездә таң атты
Сызгырып төшкән бомбалар,
Халкыбызны уятты.

Фашист илбасарлары,
Басып керде илебезгә.
Туплар шартлап, самолетлар,
Очты тыныч күгебездә.

Күпме кайгы, күпме хәсрәт,
Безгә Гитлер китерде.
Туптан атып,бомба бәреп,
Шәһәрләрне җимерде.

Бөтен халык күтәрелде,
Сакларга, — дип илебезне.
Яше-карты, Һәммәсе дә,
Безнең туган җиребезне.

Фронтовикларыбыз көрәште,
Аямыйча үзләрен.
Ант иттеләр җиңелмәскә,
Үтәделәр сүзләрен.

Ә тылдагы хатын-кызлар,
Әби-бабай, балалар.
Үтәделәр өчәр норма,
Көне-төне дә алар.

Бергәләшеп көрәшүләр,
Безгә җиңү китерде.
Кырык бишнең 9 нчы май,
Илбасарлар җиңелде.

Тугызынчы май, бәйрәм көн.
Җиңү көне ул безнең.
Каршы алыйк, онытмыйча,
Һәрбер елын ул көннең.

Фагим Хабибуллин

*****

Онытырга тиеш түгелбез!

Туган йорттан түбән очка таба,
Авыл буйлап төшеп киләбез.
Бу — ветеран йорты. Почмагында
Исем-такта, йолдыз күрәбез!
Без аларны танып беләбез!

Ветераннар! Газиз ветераннар!
Сугышлардан исән кайтканнар.
Рәхәт белән михнәт арасыннан,
Гүя урталыкны тапканнар —
Бакыйлыкка күчеп ятканнар.

Әткәй белән бер-бер артлы киткән,
Яугирләрне искә алабыз!
…Чардуганнар аша, хөрмәт итеп,
Чәчәк бәйләмнәре салабыз.
Башны иеп тып-тын калабыз.

Чит-ят җирдә курган-каберлекләр,
Исемсез дип, исем алганнар.
Азатлык дип, иле, җире өчен.
Азмы анда ятып калганнар!?
Мәңгелеккә башын салганнар.

Җиңү көне — олы бәйрәм бүген!
Җиңүчене данлый илебез!
Канын коеп, гомерен биргәннәрне,
Онытырга тиеш түгел без,
Онытырга тиеш түгелбез!

Мукарама Саитгалиева

*****

Соңгы кыңгырау

Соңгы кыңгырау

Мәктәп еллары шаулап,
Уздылар сиздермичә.
Менә инде, килде ул көн,
Килде ул, көттермичә.

Кыңгырауның соңгы моңы,
Ул соңгысы мәктәптә.
Кире кайтмас дәртле ул көй,
Чакырсак бик мактап та.

Киләчәккә бирә ул дәрт,
Яңа үрләр яуларга.
Илебезгә тугры булып,
Тик ак юллар сайларга.

Башларымда мең төрле уй,
Күңел әрни, эзләнә.
Җиз кыңгырау тавышына,
Үзәкләр өзгәләнә…

Кыңгырауның соңгы җыры,
Беренче зур тормышка.
Онытмабыз мәктәпне без,
Мәктәп үрнәк уңышка!

Укытучым, рәхмәтлемен,
Синең алда баш иям.
Уңышларым булыр чиксез.
Мәктәбем-сине сөям.

Гульфия Гизатова

*****

Мәктәпне тәмамлаучыларга

Сез таралгач, мәктәп бушап калыр,
Тәрәзәләр карар ямансу.
Кыңгырау чыңында моңлы сагыш,
Сау бул, мәктәп, җитте хушлашу.
Олы юлга сезне озатабыз,
Теләкләрнең юллап изгесен,
Сездән килсен шатлыклы хәбәрләр,
Укучы ул — мәктәп көзгесе.
Туган мәктәпне сез онытмагыз,
Ул – белемнең тәүге бишеге.
Сезне мәктәп сөенеп каршы алыр,
Һәрчак ачык аның ишеге.
Барыр юлларыгыз якты булсын,
Гел кояшлы килер көнегез.
Хыялларны тормышка ашырып,
Белем үрләренә менегез,
Һәрчак кеше була белегез.

Римма Гайнанова

*****

Укытучыга

Укытучыма

Бүгенгедәй, минем хәтеремдә,
Иң беренче белем бәйрәме.
Бер кулымда әни кулы иде,
Ә берсендә чәчәк бәйләме.

Тәүге звонок шылтырады безгә,
Ачты олы белем юлларын.
Мәктәп доньясына рәхим ит дип,
Укытучым сузды кулларын.

Тәүге укытучым каршы алды,
Үзе җитди, үзе ягымлы.
Белем доньясына юллар салды,
Яраттырды туган ягымны.

Укытучым, тәүге укытучым.
Өйрәтте ул тәүге хәрефне.
Хич онытмам, ак дәфтәргә сузып,
Әни, — диеп язган дәресне.

Хәрефләрдән яңа сүзләр туды,
Ә сүзләрдән – яна җөмләләр.
Бәлки әле гади бер укучын,
Шигъри биекләргә урмәләр.

Рәхмәтлемен, тәүге укытучым!
Урнәк булдын безгә гомергә.
Биргән белемнәрен, киңәшләрен,
Мин саклармын мәнге, гомергә.

Гульфия Гизатова 

*****

Мактауларга лаек укытучы!
Ул бит безгә белем бирүче.
Белем чишмәсенең күзе бит ул
Зиһеннәргә аңнар төрүче.

Укытучы! Күпме нәни күзләр
Карашларын аңа төбәгән.
Күзләр аша күңел түрләренә
Акыл сүзен җыеп төпләгән.

Тәүге хәреф, сүзне, җөмләләрне
Укытучы безгә өйрәтте.
Тукай теле аша туган матур,
Саф татарча шигырь сөйләтте.

Укытучым, аның дәресләре,
Туган мәктәп мәңге хәтердә,
Тәүге дәресемне күрер өчен
Кайтыр идем очып хәзер дә.

Гульфия Гизатова 

***** Читать далее →

Никах туе

Никах туе

Бүген бездә никах туе,
Бүген бездә тантана.
Бәхетле пар табышкан дип,
Бар туганнар шатлана.

Бер-берсенә сүз бирешеп,
Чәчләрен бәйли чәчкә.
Кияү егет батыр булса,
Кызыбыз назлы чәчкә.

Матур пар булып тугансыз,
Язмышыгыз бер булсын.
Гаилә бәхетегез дә,
Гел шулай ташып торсын.

Бүгенге туй бәхет туе,
Шатлык мәхәббәт туе.
Сөю учагын сүндерми,
Яшәгез гомер буе.

Гульсум Набиуллина

*****

Алтын туй

Алтын туй

Пар алмадай парлы булып,
Озын юллар үттегез.
Бар авырлыкларны үтеп,
Алтын туйга җиттегез.

Әле дә сез бик чибәрсез,
Күңелегез яшь әле.
Алда тагын бик күп еллар,
Парлашып яшәң әле.

Тәүге сөю-мәхәббәттә,
Тигез гомер итегез.
Тормышның серле йомгагын,
Әкрен бергә сүтегез.

Яшәгез әле,күпләргә,
Сез өлге, үрнәк булып.
Алтын туйларны үткәрең —
Бәхет-шатлыкка тулып.

Гульсум Набиуллина

*****

Хатын-кызларга

8 март

Бүген әни бәйрәме!
Нәни чактан әниләрне
Котлый торган көн бүген.
Сагындыра балачагым
Дәү әни инде үзем.
Шәфкать нурына төрә ул,
Биләгәндә назларга.
Әниләр бит үзләре дә,
Охшаш шуңа язларга.
Бар гүзәллек Әниләрдә,
Әниләрдә җылылык.
Әниләр бит тормыш яме,
Әни булу — горурлык.
Бәбиләрем, алтыннарым,
Багалмам балаларым.
Мин Әнидән изге җанлы
Кешене таба алмадым.
Әниләр иң-иң кадерле,
Хөрмәткә лаек һәр көн.
Әниләрнең газизлеген
Йөрәктә йөртсен һәр кем.
Кызганмагыз җылы сүзне,
Гөлләмәгә күмегез.
Әниләрнең бәхете дә,
Сездән тора, белегез!

Мукарама Саитгалиева

*****

Иртән иртүк биштә торып,
Камыр куйдым әчегә.
Аяк астында буталма,
Эш күп, дидем мәчегә.
Онытмадым күз төшереп,
Алырга зур көзгегә.
Тәмле салатларны шуннан
Ясап алдым тиз генә.
Шулпа куеп җибәрдем дә,
Торт эшләргә керештем.
Өлгерерлек түгел, малай,
Чиратта — ит бәлешем.
Өстәл сыгылып торырлык
Булсын инде! Бәйрәм бит!
Кулдан килгәнчә тырыштым,
Ир-ат риза калсын дип.
Иртәгәгә запас торсын —
Пилмән бөгеп ташладым.
Сигезенче март иртәсен
Дуслар, шулай башладым.
Ә сез?

Люция Аблеева

*****

Бүген хатын-кыз көне

Ир-егетләр чират торып
Чәчәк алалар бүген,
Әллә кояш та көнләшә
Болытлап тора күге.

Чәчәкләрнең ниндие юк-
Алы, кызыл, аклары,
Чәчәкләрнең чәчәк хакы-
Югарыдан хаклары.

Хагына да карамыйлар
Чәчәк сайлый ир-егет,
Бүген бит кызлар бәйрәме
Ничек торсыннар җебеп?

Хатын-кызның күңеле аяз
Болытласа да күге,
Өй түре чәчәктәй балкый
Бүген хатын-кыз көне !

Найля Аюпова

*****

Бәйрәм белән!
Галәм киңлегендә бүген,
Олы бәйрәм, тантана.
Язның беренче бәйрәме
иртә таңнан башлана.

Кояш кебек көләч йөзле,
Әнкәебез уята.
Чәчебездән сыйпап үтә:
Кайсыгыз йоклап ята?!

Без торганчы тәмле исләр,
Өй эченә таралган.
Мич алдында коймак пешә,
Май чыжылдый табада.

Алты бала дәррәү килеп,
Сикерешеп торабыз.
Шау-гөр килә котлаулардан,
Туган нигез — оябыз.

Кемнәребез чигү чиккән,
Кемебез челтәр-бәйләм.
Изге йолага әйләнгән
бүләксез үтми бәйрәм.

Гөрләвекләр йокласа да,
Бездә бәйрәм, тантана.
Хатын-кызлар көне бүген,
Котлаулардан башлана..

Мукарама Саитгалиева

*****

Бәйрәм белән

Бәйрәм белән сезне кызлар,
Котлыйм ихлас йөрәгемнән.
Бөтен уй-хыял чынга ашсын,
Мин юллаган теләгемнән.
Иң әүвәлдән телимен сезгә,
Тормышыгыз тыныч булсын.
Көннәр якты, төннәрдә татлы,
Төшләр генә кереп торсын.
Сау-сәләмәт яшәгез кызлар,
Һәммәгезгә телим саулык.
Шат булыгыз һәр мизгелдә,
Саулыгыгыз булсын байлык.
Гомер буе мул яшәсәгез иде,
Авырлыклар күрми генә.
Кайгы-хәсрәтнең ни икәнен
Беркайчан да белми генә.
Көнен-төнен һәм иртә-кичен,
Тик назларга күмелегез.
Күтәренке халәттә булсын
Һаман сезнең күңелегез.
Чынга ирештерсен Ходабыз,
Мин теләгән теләкләрне.
Саулык, байлык, тыныч гомер,
Булсын Раббым бүләкләре.

Ильдар Бикмуллин

*****

8 Март

Күпме бәйрәм төшерелгән
Календарь битләренә.
Иң матуры, иң яхшысы,
Кергән март эчләренә.
Багышланып язылган,
Кадерле әниләргә.
әбиләргә, апаларга,
Кызларга, сеңелләргә.
Ир-ат тоткан төрле чәчәк,
Каушап калган йөзләре,
Әйтмәсә дә, күзләреннән,
Күренә назлы сүзләре.
Бу доньяда иң матурлар,
Иң кадерле бит алар!
Алар өчен күңелемнән,
Чыга шигырьлы юллар.
Бердән-бер минем теләк,
Яшәгез шатлык күреп.
Кайгы-хәсрәтне читләп
Бәхетле юлдан йөреп.
Күпме бәйрәм төшерелгән
Календарь битләренә.
Иң матуры, иң яхшысы,
Кергән март эчләренә.

Алмаз

*****

Гашыйклар көне

Гашыйклар көне белән

Гашыйклар көне белән
Тәбрик итәм дусларым,
Яшәгез сез сөю-назда,
Ямен тоеп дөньяның.

Һәркемнең күңел кояш,
Җан җылытыр нур сипсен,
Ялгыз тибүдән өшегән
Йөрәкләрне эретсен.

Бер көн түгел, бар гомергә,
Яратыйк якыннарны.
Бәхет йолдызына тиңләп,
Саклыйк сөйгән ярларны.

Тик бер тапкыр чәчәк аткан,
Сөю гөлен шиңдермик
Чәчкәсен кадергә төреп,
Саклап гомерле итик.

Олы хисләрне яңарткан
Бәйрәмчә үтсен бу көн
Сөюгә төренгән йөрәк,
Тик бәхет өчен типсен!

Дамир Ахметзянов

*****

Гашыйклар көнендә

Гашыйк булдым сиңа тәү күрүдә,
Шундый матур, сихри айлы төндә.
Очраштык без синең белән көтмәгәндә,
Мәхәббәтле гашыйклар көнендә.

Чын мәхәббәт алып килде сөю,
Йөрәк тулы ялкын,яну-көю.
Сиздермичә килде,капыл гына,
Рәхәт икән ләззәтләнеп сөю.

Тынгы бирми йөрәкләргә —
сөю көче,
Үзе татлы, һәм ләззәтле, үзе көчле.
Без икебез бер бөтендәй
тибә йөрәк,
Буйсындыра, күңелләргә канат куя —
сөю көче.

Гульсум Набиуллина

*****

Scroll Up